التخطي إلى المحتوى

   رواية روح الأدهم  الجزء الثاني 2 الفصل الثالث بقلم هاجر العفيفي

فى فيلا الحديدى

روح : باااااس اهدوا شويه اسمع مين فيكم

أدهم دخل فى اللحظه دى

أدهم : مالك ياروحى صوتك عالى ليه

روح : لاء ده أنا بتفاهم مع الأولاد

أدهم برفعة حاجب : كده بتتفاهمى معاهم أومال لو بتزعقيلهم

أسر راح مسك فى أدهم

أسر : عمو أدهم

أدهم شالوا بابتسامه : نعم يا أستاذ أسو

أسر بطفوله : عايز العب مع جودى وهى مش راتيه

أدهم بضحك : مش راضيه ليه ياست جودى

جودى ببراءه : كل سويه يزعقلى

روح : ههههههه

أدهم : بتزعقلها ليه يا أسر

أسر بطفوله : عشان بتلعب مع عمر وأنا قولتلها لاء متلعبيش مع ولاد

أدهم فتح عينه بدهشه وبص لروح ال واقفه كاتمه ضحكتها

أدهم : ومش عايزها تلعب ليه مع عمر

أسر : كده

أدهم : حاضر أنا هعلمها

روح وقد انفجرت فى الضحك : هههههههه مش قادره انت بتسمع كلامه

أدهم وهو بينزل اسر جمب الاطفال : هاتى البنت دى وتعالى ورايا

روح بضحك : حاضر حاضر وأخدت جودى من وسطهم وراحت ورا أدهم

أدهم : خدى هنا يابت انتى معلقه مين فيهم

جودى بصتله ببراءه ومش فاهمه كلامه

روح بضحك : وضح كلامك يا أدهم هى مش فاهمه

أدهم بغيظ : بس كده حاضر قولى ياست جودى انتى بتحبى تلعبى مع مين فيهم

جودى بطفوله : حوى

أدهم : لاء قصدى على أسر ولا عمر

جودى بحركه طفوليه : الاتنين

أدهم بصدمه : الاتنين ياقادره لاء اختارى واحد فيهم

جودى بعصبيه طفوليه : انا بلعب مع الاتنين يابابى وبحب الاتنين وادينى عندهم يامامى

أدهم بدهشه : انتى بتزعقيلى كمان هجيبك منين بعد كده

روح شالتها : خلاص بقا يا أدهم متزعلش البنت

أدهم : انا اسف ياست جودى بس برضوا لينا حساب تانى بعدين بقولك تيجى معايا أنا ومامى هنخرج النهارده

جودى بتفكير : لاء هخلينى مع أسى وعمى وحوى

أدهم برفعة حاجب : والله ماشى ياجودى هترجعى تندمى وديها ياروح تلعب معاهم وتعالى عايزك

روح : حاضر وخرجتها مع الأطفال ورجعت لأدهم تانى

روح : خير يا أدهم

أدهم قرب منها : هو أنا يعنى موحشتكيش

روح بخجل : وحشتنى طبعا بس أنا معاك دايما أهو

أدهم : معايا دايما بس كل عقلك مع الأطفال بس مبقتيش منتبهه ليا خالص

روح : طب اعمل ايه يا أدهم دول أمانه هنا مينفعش اسيبهم لوحدهم

أدهم بغيظ : وأنا أطق يعنى

روح مسرعه : بعد الشر عنك ياحبيبى متقولش كده

أدهم : خلاص هتخرجى معايا النهارده

روح بتردد : بس بس

أدهم : بس ايه

روح : والولاد

أدهم : أمى موجوده والداده برضوا يعنى مش هتقف عليكى ياروحى

روح : طب وجودى

أدهم : مانتى شوفتى سالتها قدامك ومرضيتش أهو ولا هى حجج والسلام عشان متخرجيش معايا خلاص ياروح براحتك ولسه هيمشى روح مسكت ايده

روح : انت بقيت قفوش أووى يا أدهم خلاص ياحبيبى هخرج معاك

أدهم : طيب

روح بتزمر : هو ايه ال طيب شكلك لسه زعلان

أدهم : أه صالحينى يلا

روح فهمت قصده وباسته من جبينه

أدهم بصلها برفعة حاجب : بس كده

روح بابتسامه : كفايه عليك كده

أدهم : ماشى ياروح هتقعى تحت ايدى وهتندمى

روح : ههههههه مهونش عليك يا أدهومى وسابته وخرجت

أدهم بابتسامه : هتجننينى ياروحى

💫💫💫💫💫💫💫💫💫💫💫💫💫💫

فى فيلا سليم العشرى

دخل سليم الفيلا في غير موعده وطلع غرفته بس قبل مايدخل سمع ندى بتتكلم فى الفون وصوتها عالى نسبيا راح عند باب غرفتها

ندى : أيوه أنا كويسه والله وانت وحشتنى أكتر

سليم دخل فى الوقت ده بعصبيه

سليم بغضب : طب طالما وحشك مروحتيش ليه ياست هانم

ندى بدموع قفلت الفون: سليم انت فاهم غلط ده ده قاطعخا من كلامها صفعه على وشها خلتها تتجمد مكانها

سليم بحده : ايه مابتصدقى أخرج وتشوفى حياتك مانتى لو أهلك

قاطعته ندى بصراخ : اخرررررس كل الا أهلى ياسليم أنا مش هسمحلك تجيب سيرتهم أبداااا وانا مسمحلكش انك تشك فيا حرام عليك بقا كفاااايه انت ايه وال كنت بكلمه ده أدهم وحتى شوف رفعت الفون قدامه وكان رقم أدهم فعلا

سليم كان بيبصلها بملامح جامده مفيش أى تعبير

ندى بنفاذ صبر ودموع : خلاص أنا تعبت ياسليم مش هقدر استحمل تانى أنا كل يوم بنام وانا دموعى على خدى وده كله بسببك انت كل يوم أقول لنفسى يمكن يتغير يمكن يرجع سليم الدكتور ال قابلته ال حبنى وحبيته وبسخريه او ال كنت فاكراه بيحبنى انت ضيعت كل حاجه كانت فى حياتى ياسليم كنت عامله حياه ورديه هعيشها معاك لكن للاسف جيت انت وخليتها سوده أنا دلوقتى همشى وهروح عند أمى وياريت ورقة طلاقى توضلى بدون شوشره ولسه هتمشى

سليم مسك ايدها بكسره : ندى متسيبنيش

ندى بصتله بجمود وبسخريه : فاكرنى هصدقك تانى سيبنى فى حالى بقااااا وسابته وبالفعل أخدت كل حاجته وخرجت وهو كان بيبصلها بانكسار وندم

💫💫💫💫💫💫💫💫💫💫💫💫💫💫

فى جزر المالديف

أدم : ايه رايك فى المكان ياقلبى

مايا : جميل ياحبيبى

أدم : أومال الجميل زعلان من ايه

مايا : مش زعلانه أسر وحشنى بس

أدم : والله وحشنى شقاوته خلاص هانت كلها يومين بالظبط ونرجع

مايا خافت أووى من فكرة انها ترجع بيتها تانى حاسه ان فيه حاجه هتحصل

أدم : يلا بقا تاكلى ايه

مايا : بيتزا

أدم بغمزه : عيونى فى ثانيه تكون عندك ياجميل انت تؤمر

مايا : هههههههه

أدم : احم ماتخلى البيتزا كمان شويه 😉

مايا وقد فهمت قصده : لاااا روح هات دلوقتى اخلص جعااانه

أدم : حاااضر يخربيتك فصيله

مايا بضحك : يلا سريعا

أدم بوعيد : حاضر راجعلك يامايا هتروحى منى فين

مايا طلعت لسانها ليه ودخلت تجرى

أدم : والله عسل

💫💫💫💫💫💫💫💫💫💫💫💫💫💫

فى فيلا الحديدى

ندى دخلت بشنطتها بس حاولت تكون طبيعيه

روح بلهفه : ندى عامله ايه ياقلبى واحشانى وباستغراب وايه الشنطه ال معاكى دى

ندى : انتى أكتر ياروحى دى شنطتى

روح : طب مانا عارفه بس ليه

ندى لسه هترد قاطعها نزول أدهم ال اول ماشافها حصنها بلهفه واشتياق

أدهم بحب : وحشتييينى ياندوووش عامله ايه

ندى : تمام الحمد لله

أدهم بتساؤل هو الأخر : ايه الشنطه دى؟

ندى بمرح مصطنع : ايه ياجماعه فى ايه وحشتونى وجايه اقعد معاكم شويه ايه مش عايزنى

روح مسرعه : لاء طبعا ياقلبى انتى منورانا

أدهم بشك : يعنى سليم مش مزعلك

ندى يتوتر : ه ها لاء طبعا ده هو حتى هيسافر شغل يومين عشان كده محبتش اقعد لوحدى

أدهم بشك أكتر : اممم متأكده

ندى بهروب من الموضوع : أهه طبعا أومال فين جودى وحشتنى جدا وماما فين

روح : طنط خرجت تجيب حاجات وجودى جوه بتلعب مع الأولاد

ندى بدهشه :  أولاد مين !

أدهم : اه صح انا مقولتلكيش عقبال عندك احنا فاتحين حضانة الأمل جوه ولاد خالد وولاد أدم وكلهم جوه

ندى بضحك : هههههههههه يانهاااار ليه أهلهم فين العيال دى

روح : بيتفسحوا

أدهم بوعيد : لما يرجعوا بس وربى لأخصملهم الاتنين من مرتبهم وهخليهم يشيلوا شغل سنه قدام

روح : حرام عليك

ندى : لاء شكلهم مزعلينك أووى يا أدهم

أدهم وهو يجز على أسنانه بغيظ: لما يجوا بالسلامه بس الأول

ندى : استر يارب طب أنا هدخل العب مع الولاد بقا اصل وحشونى

أدهم : اه يبقا عملتى فيا واجب اصل هاخرج أنا وروح وكنا شايلين هم مين هيفعد معاهم

ندى بغمزه : أى خدعه ابقوا تعالوا كل يوم وسابتهم ودخلت للأطفال

أدهم : لماضه

روح : مش ملاحظ ان ندى زعلانه

أدهم : ملاحظ بس مش عايز اضغط عليها سيبينى أنا هعرف بطريقتى

روح : ماشى وابقا طمنى

أدهم : حاضر يلا بقا انتى جاهزه

روح : خمس دقايق واكون جاهزه علطول

أدهم وهو على وشك البكاء : سريعا بالله عليكى قبل مايحصل حاجه تمنعنا نخرج

روح بضحك وهى طالعه على الدرج : حاضر هوا ياحبيبى

أدهم : يامسهل

💫💫💫💫💫💫💫💫💫💫💫💫💫💫

فى تركيا

فى أحدى المناطق الهاديه والجميله

جنه : جعاااااانه

خالد : ارحمينى بالله عليكى دى خامس مره تفطرى فيها النهارده انا اعتقد ان احنا مسافرين ناكل بس

جنه ببراءه : يرضيك تسيب جنتك جعانه

خالد : بتاخدى نقطة ضعفى يعنى ياجنه الصراحه ميرضنيش

جنه باسته من خده : شاطر ودينى لعيالى بقا

خالد : بجد أنا منى لله عشان فكرت أسافر معاكى كنت جيت أخدت واحده من هنا وقضيت معاها يومين فى الخيال

جنه بصدمه : ياخااااااااااااين أخرتها تعمل كده اهئ اهئ مكانش العشم يابو عمر

خالد : طب اطلقها دى ولا اعمل فيها ايه يابنتى اطلعى من دور ام أشرف ده شويه يخربيت الفصلان

جنه ببراءه : عايزنى افرفش ودينى فسحه حلوه

خالد برفعة حاجب : وايه يضمن انك تفرفشى بعدها ومفيش نكد

جنه : سيد متقولش كده احنا أهل انت بتشك فى قدرات مراتك

خالد بسخريه : أنا بشك فى مراتى نفسها

جنه : قومى يابنى خرجنى وأكلنى بره يلا وأنا بص هبهرك رومانسيه يلا بس

خالد بنفاذ صبر : حاضر ياختى لما نشوف قومى

جنه نطت وباسته فى خده : هيييييه حبيبى يا أبو العيال وسابته ودخلت تغير هدومها

خالد خبط كف فوق الأخر : وربنا أنا متجوز مجنونه

💫💫💫💫💫💫💫💫💫💫💫💫💫💫

عند روح وأدهم

كانوا بيتمشوا فى أحدى المناطق المطله على البحر وكان شغاله أغنية لتامر عاشور رومانسيه وكانوا مندمجين معاها جدا وحاسين كلامتها وبيوجهوها لبعض وبعد مانتهت الأغنيه أدهم بص لروح ال كانت سرحانه 

أدهم : تصدقى ياروح أنا كل يوم قلبى بيثبتلى ان بعشقك عن اليوم ال قبله انتى بقيتى كل حياتى وروحى فعلا

روح بابتسامه : انت ال كل يوم بتثبتلى ان أخترت صح وربنا عوضنى بيك وعوضنى عن حرمانى من أهلى ال ماتوا بيك انت أنا بحبك أووى يا أدهم

أدهم ضمها لصدره بحنان : احنا اتخلقنا لبعض ياروحى أدهم لروح وروح لأدهم ربنا يخليكى ليا ياحياتى وعمرى ال جاى

روح بمرح : ويخليك ليا يازوجى العزيز

أدهم : قلبه وربى

روح لسه هترد قاطعها واحد صديق أدهم قابلهم

كريم : أدهم أخبارك ايه ياباشا وحشنى

أدهم : انت أكتر ياصحبى عامل ايه

كريم : تمام ايه ياعم محدش شافك من يوم فرحك ليه معتزل العالم ازيك يامدام روح

أردفت روح بابتسامه : الحمد لله

أدهم بضحك : طول عمرك رخم ياكريم

كريم بغرور : عارف يابنى طبعا المهم بنتك عامله ايه

أدهم : كويسه وبتقولك مش عايزه تشوف وشك

كريم : البت طلعت بتحبنى زى أبوها وبغمزه ايه ياعم مش ناوى تفرحنا بولد كده يشيل اسم الحديدى

روح غمضت عيونها بألم شديد وحاولت تتماسك ودموعها متنزلش

أدهم بص لروح بحزن عشان عارف ان الكلام ده بيتعب نفسيتها حاول يخلص من كلام كريم : ان شاء الله بس خلينا نفرح بيك الأول

كريم : لاااااا لسه بدرى يابنى بعد الشر يلا هسيبك أنا بقا عشان مستعجل جدا سلاموز

أدهم : مع السلامه ابقا اسال

كريم : حاضر سلام ومشى وسابهم

أدهم نظر لروح ال كانت ساكته ومتكلمتش واتحدث بهدوء

أدهم : ممكن أعرف مالك بقا

روح بدموع : أدهم أنا حاسه ان عاجزه أووى عاجزه ان افرحك بالولد ال نفسك فيه عاجزه ان

قاطعها أدهم  : هشششششش كفايه هنرجع تانى للكلام الأهبل ده أنا قولتلك قبل كده ياروح وهقولهالك تانى انا عمرى ماهستغنى عنك مش عايز نقاش فى الموضوع ده تانى ماشى

روح بدموع : حاضر

أدهم ضمها ليه أكتر ومسح دموعها بمرح : نكدووو مش وقتك بالله عليكى عايزين نفرح ساعتين

روح ابتسمت على كلامه

أدهم بابتسامه أيوه كده بقا هو ده الكلام ابتسامه تملى الدنيا أمال

روح بحب : بحبك يانبضى

أدهم : بحبك ياروحى

وكملوا مشى وقت كبيييير جدا وكانوا بيهزروا ويضحكوا ويرجعوا أيام زمان من تانى وكان وقت جميل عدا عليهم

💫💫💫💫💫💫💫💫💫💫💫💫💫💫

فى فيلا سليم العشرى

مصطفى : يعنى انت عجبك حالك ده دلوقتى

سليم بتعب : ماله حالى

مصطفى : ارتحت لما هى سابتك ومشيت

سليم بتنهيده : لاء طبعا أنا همووت من غيرها وجودها كان مطمنى دلوقتى أنا حاسس ان ضايع فعلا

مصطفى : قولتلك ياصحبى اعترفلها انت ال مرديتش وصممت تكرهها فيك

سليم : لاء أنا عارف ندى كانت هتصمم تفضل معايا لو قولتلها على كل حاجه وهكون أنا كده بظلمها معايا لكن لما تكرهنى هكون مرتاح أكتر

مصطفى : بس انت كده بتأذى نفسك ياصحبى

سليم بتنهيده : أحسن لما أأذيها هى كده أحسن يامصطفى

مصطفى بقلة حيله : ربنا يريح بالك يارب ياسليم

سليم برجاء : يااااااارب

و

قد يهمك أيضاً :-

  1. رواية هذه حبيبتي أنا الفصل السادس 6 والأخير - بقلم أحمد سمير حسن
  2. رواية نور الادم الفصل الأول 1 بقلم مريم الكسار
  3. رواية نور الادم الفصل الثالث 3 بقلم مريم الكسار
  4. رواية اخوات زوجتي الفصل السابع عشر 17 بقلم مني عبدالعزيز
  5. رواية قدر النسر الفصل التاسع 9 بقلم بسنت حسين
  6. رواية يا أنا يا هي الفصل التاسع عشر 19 بقلم هاجر عبد الرحيم
  7. رواية حب في عمليات خاصه الفصل الرابع عشر 14 بقلم ملك ايمن

التعليقات

اترك رد