التخطي إلى المحتوى

رواية بكامل قواي العقلية الفصل الثالث عشر 13 بقلم اميرة اسامة 

البارت الثالث عشر.

نزل عبده ومراته قفل انس…الباب…

وبمجرد…نزوله فجأه.. موبايله رن…

كان متوقع انه زميله فالقسم…راح بسرعه يرد…لاكن اتفاجئ بالرقم الخاص بتاع دياب.

انس….الوووو دياب.

دياب…اذيك يا واطي..

انس…بخير ياصاحبي انت عامل ايه. واحشني. بحاول اتصل بيك كتير بس مش بيجمع. والله وبيوصلي رساله ان التليفون متاح اتصل بردو يرجع يديني غير موجود بالخدمه عشان الصحرا اللي انت فيها دي..المهم طمني عليك..والله وحشتني

دياب…انا بخير الحمد لله كله تمام.

واضح اوي اني وحشتك بأماره ما بتفكر تيجي مع سياده اللواء بكره ولا لا..

انس. والله مش حكايه تفكير انت عارف اني عايز اجي..بس قولتله هظبط الشغل واشوف حد من العيال يمسك بدالي..

دياب…وحيات امك انت نبطشيتك بليل وهو جاي الساعه 10..هتصيع عليا

انس…يا عم متبقاش زي القطر كده انا مش بصيع بس انا بخلص الصبح وهو هيمشي علي 10 واكيد هنتأخر معاك…وانا تعبان جدا مش هقدر ارجع عالشغل من غير ما انام فا كنت مستني ابدل مع حد ولما ارجع اروح انام…

دياب…ماشي ياسيدي..المهم…عايزك في خدمه…او بمعني اصح لمار اللي عيزاها..

انس….كارمن.

دياب…وانت ايش عرفك🤨🤨

انس…هي محتاجه ذكاء يعني لمار هتحتاج مني ايه غير كارمن او مامتها..

دياب…ماشي ياذكي…عايزك تعرفلي اذا كانت فيها حاجه او لا..

سكت…انس شويه واستغرب. اشمعني…

دياب…ابدا بس من كام ساعه كده….وابتدا دياب يحكيله من اول ما كانو بيتكلمو وتعبها ولما كلمت كارمن وحكاله كل حاجه..

دياب…بس فا هي واثقه ان فيها حاجه وانها مشيت من البيت عشان صوت البحر ده وحقيقي هي كانت فاتحه الاسبيكر وسامع صوت بحر وصوتها كان تعبان والغريب انها حست انها لمار مع انها متكلمتش انا كنت محذرها.

انس…انت بتهرج اولا عشان كلمتها من رقمك ده وانك تجازف تخيل لمار مكنتش قدرت وكلمتها…عموما انا في حاجه عايز اقولهالك مهمه. وشوف بقي هتعرف لمار ولا لا دي بتاعتك انت بس لازم تعرف..

دياب…في ايه قلقتني…كارمن فيها حاجه.

انس…انا هقولك…وابتدا انس يحكيله كل حاجه حصلت من اول مكالمه كارمن ليه اول مره لما طلبت منه ميكلمهاش لحد اللي حصل..انهرده والتعذيب اللي فيها..

دياب….يا نهار اسود ومين عمل فيها كده.

انس…مفيش غير الكلب ابوها..

دياب…تفتكر ابوها يمكن جوزها غصب عنها واللي اتجوزته عمل فيها كده.

اتصدم…انس….انت بتقول ايه…

دياب…هي مقالتلكش حاجه..

انس…لا هي اول ما خرجتها من الصخور اغم عليها ومن وقتها مفاقتش.

دياب…وانت سايبها شوفها لاتكون ماتت ولا فيها حاجه دي محتاجه دكتور.

انس…انا كنت هوديها المستشفي بس قبل ما يغم عليها قالتلي مجيش جمب ابوها عشان ميعرفش طريقها مرضتش قولت اجبها عالشقه والدكتور اللي هنا اجيبه يكشف عليها..بس هو فالمستشفي لسه مرجعش…

دياب…حاول تجيب دكتور متتأخرش عليها عشان الجروح دي متعملش تسمم يا انس…ولازم حد يأعد معاها ويراعيها.انت بتروح الڤيلا

انس…متقلقش اطمن عليها بس وبعدين اظبط كل حاجه.

دياب…ان شاء الله خير..

انس…هتقول للمار..

دياب…بحيره مش عارف..لو مقولتلهاش هتفضل قلقانه…ولو قولتلها معرفش هترتاح ولا بردو هتفضل قلقانه..

انس…ده ايه الحنيه دي كلها 😉😉

دياب…ولا حنيه ولا حاجه بلاش دماغك تروح لبعيد بس لاحظ ان اي تشتيت ليها هيأثر علي التدريبات….

انس…لا ياشيخ ماشي هصدقك..عموما انا من رأيي انك تقولها ادام كده قلق وكده قلق يبقي عالاقل بس تطمنها انها الوقت بخير…

دياب…تمام اكيد هعمل كده..المهم الوقت انك تشوف دكتور في اسرع وقت

انس…متقلقش هعمل كده انت مش متخيل الجروح اللي في جسمها..

دياب….ان شاء الله خير…انس.

انس…نعم..

دياب…عايز اطلب منك حاجه

انس…قول يا صاحبي.

دياب…والدت لمار..

انس…اشمعني.

دياب…عايزك تروحلها..

انس…اروحلها ليه..واقولها ايه

دياب…انا هقولك بس متنساش الموضوع ده بيني وبينك وبس مفهوم.

انس…تمام قول.

دياب….فضل دياب يقوله اللي هو عايزه كله والسبب اللي يخليه يروح..لوالدت لمار…….

دياب…فهمت هتعمل ايه.

انس…فهمت ياصاحبي مش بقولك في حنيه كده مش مريحاني ده بردو عشان المهمه متبوظش

دياب…لا يارخم ده عشان لمار نفسها عشان انا واثق ان في حاجه غلط فهمت

انس…فهمت ياسيدي عموما انا كمان واثق من اول يوم ان في حاجه غلط واطمن انا هفضل ورا الموضوع ده لحد ما اجيب اخره..

دياب…هعتمد عليك يا انس.

انس…اطمن يا دياب خير ان شاء الله..بس هعدي يومين تلاته كده بس اطمن علي كارمن..

دياب..تمام.

انس…مش عايز حاجه ابعتهالك مع سياده اللواء.

دياب…لا تسلم يا صاحبي كل حاجه موجوده هنا..

انس…تمام…خلي بالك من نفسك

دياب…وانت كمان ومش عايز تهور مع ابوها

انس…خليها علي الله

دياب…طب يلا انت بقي الحق اناملي شويه قبل ما نصحي للتدريب الصبح

انس…تمام يلا سلام

دياب…سلام…

قفل انس…و بعد ما قفل سمع خبط عالباب…راح فتح كان البواب ومعاه الدكتور..

انس…اهلا يا دكتور اتفضل

البواب…هن ل انا يا انس باشا عشان مسبش الباب تحت. بس لو احتجتني كلمني.

انس…تمام يا عبده انزل..

دخل انس ومعاه الدكتور…لاوضه كارمن..

الدكتور…خير.

حكاله انس باختصار

الدكتور…مش هي دي نفس البنت اللي كانت..

انس مقاطعا ليه…ايوه هي

الدكتور..ابتدا يكشف عليها ويشوف الجروح وتقسيمات وشه مكنتش تبشر بخير..

خلص الدكتور كشف.. وغيرلها علي الجروح اللي في جسمها

انس غطاها كويس وخرج هو والدكتور بره..

انس. خير يا دكتور…

الدكتور…عندها جروح في جسمها خطيره مش هكدب عليك… هي المفروض تكون الوقت فالمستشفي بس طبعا حضرتك فاهم ده وادام جبتها علي هنا اكيد انت مش حابب انها تروح المستشفي..بس انا ممكن اساعدك واعدي عليها كل يوم لحد ما حالتها تتحسن…بس طبعا انا اسف للسؤال حضرتك يعني البنت دي تاني مره اشوفها وكل مره حالتها اسوء من اللي قبلها.حضرتك عارف مين اللي بيعمل فيها كده…

انس…للاسف لا…اول مره لما جت كانت سمعت خبر وفاه صحبتها انها اتحكم عليها بالاعدام….اما المرادي مش عارف مين عمل فيها كده هي كلمتني وانا روحتلها فورا واول ماروحت اغم عليها بس قبل ما يغم عليها طلبت مني اني مودهاش المستشفي .بس دي كل الحكايه وبالنسبه للجروح انا مكنتش اعرف عنها حاجه…بس ورده مرات عبده بعتلها عشان تغيرلها وهي اللي بلغتني..

الدكتور…بس لازم تعرف مين اللي عمل فيها كده وتبلغ عنه البنت ضعيفه وكان ممكن تروح فيها دي سبحان من اداها قدره انها تعيش وتقاوم.

انس…تفوق بس واعرف منها وانا مش هسمي عليه.

الدكتور…. ان شاء الله نطمن عليها انا كتبتلك روشته طويله فيها كل حاجه محتاجها…عايز الكريمات دي عشان الجروح…واحد فيهم تجميل وده اخر حاجه هنستخدمها بعد ما تتحسن وواحد فيهم مضاد حيوي والتاني مخدر موضعي لان الوجع اللي مسبباه الجروح ده صعب جدا ومش هتقدر تستحمله…

وكتبتلها…محاليل تقويها شويه…

وكتبتلها مضاد حيوي اقراص ومضاد للالتهابات والتورم…وطبعا الاخير ده مهدأ هي الفتره دي محتاجه انها تنام عشان طول ما هي صاحيه مش هتستحمل الوجع ..الجروح اللي في جسمها دي مع البرد بتعملها وجع رهيب زي احساس الكهربا وبالظبط كأن في نشر في جسمها فالنوم ليها افضل كتير عشان تقدر تقاوم…

انس…تعبتك معايا يادكتور سعد.

الدكتور…متقولش كده يا انس باشا احنا جيران ومفيش بينا الكلام ده المهم بس تقوم بالسلامه

انس…يارب.

الدكتور…استأذن انا بقي وبأذن اللي هعدي عليها بكره قبل ما اروح المستشفي بليل واي وقت تحتاجني ابعتلي عبدو او كلمني رقمي معاك صح.

انس…ايوه معايا وشكرا ليك بجد.

الدكتور…العفووو يلا بعد اذنك.

انس…اتفضل يادكتور

خرج الدكتور من عند انس…حس انس انه مش قادر وتعبان خالص….دخل جوه عندها الاوضه واعد ادامها عالكرسي..باصصلها بحزن…كانت شبهه الاموات…وكأنها مستسلمه للموت خلاص…

قرب انس منها اعد جملها علي حرف السرير…. مسك ايدها وقرب ايده التانيه من شعرها…وفضل يمشي ايده علي شعرها وعينه علي ملامحها….

انس…..بصوت واطي….انتي عارفه اني كنت مضايق جدا لما قولتيلي مكلمكيش تاني…يمكن كنت حاسس ان فيكي حاجه بس مكنتش متأكد…بس انا كنت هتجنن عليكي. متسألنيش ليه…بس بجد هقولك علي سر يمكن لو انتي صاحيه وقولتهولك هتقولي اني بكدب عليكي بس صدقيني انا مش بكدب انتي وحشتيني اوي ياكارمن اول مره قلبي يدق لحد كان انتي من يوم ما شوفتك ومش عارف انتي عملتي فيا ايه….من يوم ما شوفتك اول مره في مكتب دياب وانتي بتدافعي عن لمار وانتي خطفتيني لما سوفتك بتعيطي كنت عايز اخدك في حضني انا وقتها مصدقتش نفسي ولا احساسي واقنعت نفسي انك بس صعبانه عليا. وكنت بحاول اشغل نفسي عن التفكير فيكي لاني باختصار عمري ما اقتنعت ولا صدقت الحب من اول نظره…..

ايوه حب ياكارمن…اللي انا فيه ده ملوش مسمي تاني غير حب…كنت طول الوقت عايز القضيه متخلصش عشان اشوفك….خلتيني اصدق ان لمار بريئه عشانك…يوم ما جتلك الشارع وشوفتك وانتي بتتخانقي كنت واقف من بعيد مبسوط بيكي مش عارف ليه…لاكن اول ما حسيت ان ابوكي هيأذيكي اتدخلت…لما خدتك ومشيت بيكي. واتكلمنا كنت متعمد اني اضايقك بالكلام…عشان تعيطي ووقتها اراضيكي واخدك في حضني كان جوايا شعور ديما انك محتاجه حد يطبطب عليكي ويقف معاكي…بس مع الوقت اكتشفت اني انا اللي كنت محتاجك ومحتاج حضنك…لما قولتلك علي خبر موت لمار انا اللي كنت بنهار عشانك ياكارمن… وانا شايفك ادامي بتنهاري يمكن دي المره الوحيده اللي كنت مش عايز اشوفك وابلغك بالخبر ده…بس مكنش فيه غيري وقتها يبلغك…كان نفسي وقتها اقولك ان لمار عايشه عشان بس مشوفكيش فالحاله دي..بس مقدرتش ولما كلمتيني انهرده اول ما شوفت رقمك مصدقتش وثواني وكلمتك. كنت حاسس ان في حاجه وانا بكلمك. لما سمعت صوتك كنت عابز اكون ادامك في لمح البصر يمكن المسافه بيني وبينك كانت دقايق بس قلقي عليكي كان مطول المسافه اوي ياكارمن…ولما شوفتك يا كارمن وشوفت العذاب اللي اتحملتيه حسيت اد ابه ان قصرت معاكي ومكنش لازم اسمع كلامك ومكلمكيش تاني…وحشيت وقتها ان لو كنت شوفت ابوكي كنت قتلتله موقفنيش غير كلمتك ليا اني معرفهوش… بس صدقيني ياكارمن لو هو اللي عمل كده مش هرحمه ولا حتي عشانك لازم يدفع تمن كل جرح سببهولك …عرفتي ياكارمن انا جوايا ايه مخبيه ليكي…بحبك ياكارمن…ومن انهرده انتي بتاعتي ومش هسمح لاي حاجه تأذيكي مهما كانت وطول مانا معاكي… هنسيكي اي حزن ووجع..

قرب انس…ايدها من شفايفه وباسها. ورجع تاني عالكرسي وهو ماسك ايدها وفضل باصص عليها لحد ما راح فالنوم…

عدت الساعات بسرعه…

صحيت لمار…بتعب حاسه بدوخه من كتر كا عيطت ..دخلت خدت شاور وجهزت للتمرين…لبست وظبطت نفسها وخرجت بره وقفت تبص علي ممظر الخلاء اللي ادامها ….وفضلت سرحانه

دياب…صباح الخير

لمار…ضباح النور.

دياب…صاحيه بقالك كتير.

لمار…لا من شويه بس ولسه يادوب خارجه من الاوضه…

دياب…طيب انتي كويسه

لمار…الحمد لله..

دياب…طيب يلا عشان تفطري.

لمار…معلش انا مليش نفس.

دياب…انهرده عندنا تمارين كتير مش هتقدري..

لمار…لو حسيت اني جعانه هبقي اكل بس بجد انا مش عايزه اكل…

دياب…زي ما تحبي..صحيح. سياده اللواء جاي انهرده يعني كام ساعه ويكون هنا مش محتاجه حاجه هو كلمني وقاللي اسألك عشان لو في حاجه نقصاكي يجبهالك…

لمار…لا شكرا..مش محتاجه اي حاجه…

دياب…كان ملاحظ نبره صوتها وشكل عينها الحزن مغطيهم…

دياب…لمار….انا عايز اقولك حاجه..

لمار..وهي باصه علي الصحرا اللي ادامها اتفضل..

دياب…كارمن

بصتله لمار برعب….😳عرفت عنها حاجه..هي كويسه.

دياب…اهدي لمار بخير…وتقدري تقولي كده انها بقت في امان.

لمار…انا مش فاهمه حاجه..

دياب…بصي هو انا مش فاهم اوي او لسه مش عارفين حاجه بس عايزك تطمني هي مع انس.

لمار…مع انس ازاي وليه

دياب…بصي انا مش عارف كل الحكايه ان………..وابتدا دياب يحكيلها اللي انس قالهولها….

دياب…بس يعني كل اللي نعرفه حاليا انها هربت واتصلت بانس وهو راح خدها وهي الوقت عنده بس تعبها مخليه مش عارف هربت ليه ولا ايه اللي حصل ومين اللي عذبها كده

..هو شاكك في والدها بس انا بقوله استحاله..

لمار…وهي بتمسح دموعها مفيش حاجه اسمها استحاله مع ابوها ده لو طال يموتها اكيد هيعمل كده ده استحاله يكون اب..

دياب…طيب ممكن تهدي اهم حاجه الوقت اننا اطمنا عليها وهي الوقت في امان واستحاله ابوها يعرف يوصلها ومتقلقيش عليها انس هيقدر يحميها..وهو قاللي انه مش هيرجعها وهيجبلها حقها كمان..

لمار…كارمن طول عمرها متبهدله معاه عمرها ماتفتكرله حتي يوم كويس

دياب…اكيد ربنا شايلها حاجه احسن صدقيني.واكيد ربنا هيكرمها…الكهم الوقت انك متطمنه عليها..

لمار….طيب ممكن اخر طلب وصدقني مش هطلب منك اي طلب تاني.

دياب…اتفضلي

لمار…عايزه اشوفها خلي انس يصورها صوره بجد نفسي اشوفها اوي..

دياب….هقوله يالمار حاضر….المهم انا طمنتك عليها فوقي كده بقي ويلا ورانا كذا حاجه نعملها قبل ما يجي سياده اللواء…

لمار…تمام انا جاهزه…

قامت…لمار مع دياب وابتدو تمارين…

والوقت كان بيمر بسرعه

وصل اللواء للمكان الخاص اخيرا..

دياب…نورت ياحاتم باشا..

حاتم…وحشني ياوحش ايه الاخبار

دياب…كله تحت السيطره.

حاتم…انال هي فين…

دياب…فوق منتظره حضرتك تعالي نطلع.

حاتم يلا بينا..

طلع حاتم ودياب…مع بعض…

راح دياب خبط علي اوضه لمار…

ثواني وفتحت.

دياب…سيادهواللواء وصل وعايز يشوفك..

خرجت…معاه لمار… حاتم كان واقف سلم عليها

حاتم…اخبارك ايه يالمار..

لمار…بخير حضرتك الحمد لله..

حاتم….عامله ايه فالتدريبات.

لمار…الحمد لله بحاول علي اد ما بقدر.

حاتم…بش دياب مبسوط منك جدا ومن شغلك وبيقول انك ذكيه وقادره انك تستوعبي بسرعه..

لمار.. الفضل يرجع ليه دياب باشا تعب معايا جدا خلال الاسبوع ده وحقيقي عمل معايا مجهود كبير.

دياب….بس ده ميقللش امكانياتك يالمار انتي فعلا ذكيه..وبتستوعبي المعلومه بسرعه..

لمار…مكنتش مصدقه اللي بتسمعه اول مره تشوفه بيشكر فيها طول الوقت كانت حاسه انه مقلل منها ومن اي حاجه بتعملها ولو مقللش بيقول مش بطال…

لمار…شكرا لحضرتك…

حاتم…طيب طمنوني ايه اللي فاضلكم وايه اللي واقف ادامكم.

دياب…التدريبات والتمارين والدفاع عن النفس تقدر حضرتك تقول انه كله تمام بس طبعا لازم تمرين عليهم كل يوم اللغه لمار يمكن الانجليزي كويسه فيه الي حد كبير اوي…طبعا بدأته معاها من اول هي بس محاجه ممارسه الفرنساوي ابتدت تستوعبه وحاليا نقدر نقول بنسبه 40 فالميه وعلي اسبوع فا ده بالنسبالي نتيجه مرضيه خصوصا انها طول اليوم بتتمرن وبتدرب في كذا حاجه يعني لو الفرنساوي واخد كل وقتها كانت زمانها هتبقي برفكت فيه بس للاسف الوقت مش ساعفنا خالص..

العبري بقي هو اللي كان مشكله فالاول والوقت الحمد لله لمار بسرعه قدرت تفهمه وقدرت تتكلم كمان… مفيش حاجه فاضله غير شويه فاللغه وحجات بسيطه تخص مايا ودي سبناها للاخر زي لغه الجسد اللبس المشي الحركه التعبيرات المختلفه الاكل يعني الحجات دي..

حاتم. طيب حلو جدا انتو كده قطعت. شوت كبير اوي انا جاي وفاكر اني هلاقي حجات كتير بتواجهكم ومعطلاكم بس اطمنت…

دياب…متقلقش ان شاء الله الاسبوع ده لمار هتكون جاهزه عالاقل بنسبه 80 فالميه وانوشاء الله خلال الاسبوع ده هنهليها تعمل المكالمه الاولي معاهم اللي تثبت فيها انها موجوده…وبعدها هيكون ادامنا لسه شهر لحد ما تسافر فرنسا فالوقت ده بردو مش هنوقف تمرين في اي حاجه وان شاء الله قبل ما تسافر هتكون لمار تخطت الميه فالميه..

حاتم. يارب…انا متفائل وكنت واثق يا دياب انك هتكون قدها وهتقدر تجهز لمار….بس الوقت في مشكله كبيره جدا بتواجهنا اتمني انها تخلص في اسرع وقت.

دياب..ايه هي..

حاتم…التليفون اللي كان مع مايا التليفون ده… تقريبا مخصص لناس معينه وتقريبا مش مع اي حد في بصمه وفي حجات كتير مأمنه جوه الجهاز صعب اي حد يفتحها غير صاحبها حاولنا نخترقها عشان لو فيها اي معلومه تقدر توصلنا لاي حاجه قبل ما لمار تكلمهم…لاكن للاسف محدش قادر خالص يفتحه..صعب جدا وجبنا مهندسين ومبرمجين وهاكر المل بيحاول لاكن محدش قادر يخترقه ابدا عليه شفرات صعبه بجد…

دياب…طيب وبعدين..

حاتم مش عارف يا دياب…بس لازم خلال الكام يوم ده نوصل لاي حاجه اخاف يكون عليه معلومه مهمه تقع مننا وطبعا الواضح ان اغلبهم مشفرين التليفونات بتاعتهم بالشكل ده…وطبعا صعب ان لمار ترجع وهي مش عارفه الشفره ده ممكن يكشفها ويعرضها للخطر.

لمار…كانت بتسمعهم وتايهه..وفجأه سرحت …

فلاش باااااك.

لمار…..صرخت بصوت عالي. عاااااااااااا يامعلم يامعلم يامعلم…

خالد…اللي يخربيتك في ايه..

لمار…انا من انهرده يتضربلي تعظيم سلام بنتك هتشرفك.

ناريمان…يابت انتي علي طول سرعاني كده بتصرخي كده ليه ودي منظر واحده تشرف بصوتك ده

لمار…بقول ايه ياست الكل انتي من انهرده تحترميني…بنتك هتبقي مهمه.

ناريمان ليه بقي ان شاء الله.

لمار…هقولك…في ولد هاكر معروف انه بيهكر اي موقع واي لعبه واي حساب شخص وتليفونات الواد ده الفتره اللي فاتت دي اتشهر جدا…بنتك بقي تسكت ابدا والله ما يحصل…قدرت اخترق حسابه الشخصي وادمرله كل حاجه فيه…عشان يستاهل بعد كده ومن انهرده مفيش هاكر غيري

خالد…انتي بتتجسسي علبه يالمار دي سرقه وازاي تبوظيله حسابه انتي مش هترتاحي غير لما تتجابي من قفاكي.

لمار.. ايه ده مين ده عيب ياحاج متقولش كده…انا لمار خالد البنهلوي وبعدين لنت زعلان علي حته واد صايع الولد ده كان بيخترق اي حساب لاي بنت وبيدخل علي تليفونها ياخد صورها ويهددهم وياخد منهم فلوس يعني مكنش بيعمل خير ده كان بيأذي البنات وانا عملت فيهم معروف

ناريمان يستاهل اول مره تعملي حاجه مفيده.

خالد…بس خلي بالك يالمار التهكير اللي انتي بتعمليه ده خطر عليكي ممكن تقعي في ايد حد مبيرحمش وتأذي نفسك..

لمار…متخافش يابابا انا التهكير ده بالنسبالي هوايه بحبها ومتخافش انا مش بعمل كده مع اي حد بعمل كده مع اللي يستاهل بس يعني متخفش مش فضول انا مش فضوليه.

خالد …بسخريه….انتي هتقوليلي..المهم يعني ياريت تشوفيلك هوايه تانيه غير دي وغير السرعه اللي كل شويه تسرعيهالنا بصوتك ده..

لمار…..دي فرحه الاختراق يالودي…

باااااااااااك..

حاتم…..لمار انتي معانا..

لمار….انا اقدر افك الشفره.

حاتم…شفره ايه

لمار…الموايل مش بتقول ان الموبايل عليه شفره انا اقدر افكها واقدر اخترق اي حاجه

دياب…لمار انتي سرحتي وراحت منك عالاخر بيقولك مبرمجين وهاكر ومهندسين كلهم بيحاولو ومحدش عارف…انتي هتعرفي.

لمار…،.والله ممكن ومش بس عشان ده جزء من دراستي البرمجيات…لا خالص انا يمكن دي تكون هوايتي من فتره طويله.

حاتم…بس دي معلومه اول مره اعرفها

لمار…يمكن عشان مكنتش مهمه بالنسبالكم ولا انا حتي قولت عليها ..بس ادام محتاجنها الوقت فا عادي اني اقول اني بعرف…

حاتم…لمار مفيش وقت نضيعه خالص للمحاولات .

لمار…صدقني مش هنضبع وقت وبعيدن يعني حضرتك مش هتخسر حاجه كده كده حضرتك مستني ان الموبايل يتفتح…وانا بقول لحضرتك اني هقدر..ولو حضرتك حابب تتأكد فا لو حضرتك كنت متابع من كذا سنه كان في ضجه علي السوشيال ميديا ان في شاب بيخترق المواقع وحسابات البنات الشخصيه وبياخد صورهم واي حاجه عالجهاز بتاعهم وبيبتزهم وكان بيخترق مواقع وحجات كتير.

دياب…انت فاكر اني سمعت حاجه زي دي وفاكر كمان انه اتمسك ..

لمار….تمام الولد انا اللي اخترقت حسابه اللي كان فاكر انه يقدر يأمنه واللي هاكر كتير ساعتها حاولو يساعدو البنات ويهكرو حسابه عشان كل اللي خده يروح من عليه ومقدروش…وانا قدرت وهكرت حسابه ولولا انه اتقبض عليه وقتها كان زمانه بيدور عليا عشان ينتقم مني…

حاتم…طيب ده في حد ذاته لو صح هيبقي هايل مش بس في فك شفره تليفون مايا لا ده في حجات كتير تقدري تساعدينا فيها…

لمار…انا تحت امر حضرتك…المهم ان في حجات هحتاجها لازم تجيلي.

حاتم…اكتبي كل حاجه هتساعدك وهتكون عندك بكره الصبح هي والموبايل ..تمام.

لمار…تمام..

دياب…لمار لو مش هتقدري متضيعيش الوقت.

لمار…بتحدي هقدر وهفكه…🤨

دياب….وكأنه قبل التحدي هنشوف

حاتم….طب ايه مش ناويين تفرجوني كده علي جزء صغير من التمارين..

دياب…طبعا يا افندم جاهزه يالمار

لمار….جاهزه…

نزل معاهم حاتم…وابتدت لمار تتمل ادامه جزء كبير من التدريبات زي تسلق الحواجز السواقه وضرب النار والنط لمسافات طويله…والجري … ودياب وحاتم واقفين بيتابعوها

دياب….سياده اللواء. حضرتك يعني مسألتنيش…علي اللي كنت عايز اقولهولك.

حاتم…صحيح قولتلي ان في حاجه مهمه…

دياب….مايا…

حاتم…اشمعني…

دياب…مكنتش بنت😳

حاتم….عارف المعلومه دي

ديال…طيب وحضرتك عارف كمان انها كانت بتعمل علاقات عشان تقدر توصل للهي عيزاه…ومن ضمنهم الشخص اللي المفروض لمار هتقابله بعد اول مكالمه المفروض من المعلومات اللي وصلت من كام يوم لجهاز المخابرات ان مايا وعدته تقضي معاه ليله……

حاتم…عارف يادياب…بس الاول انت معرف لمار انها هتقابل حد هنا في مصر.

دياب…لا لسه مستني الاوامر عشان ابلغها…وكمان عشان متتوترش وتقدر تركز في التدريبات..

حاتم…بس انا شايف انك لازم تبلغها

دياب…تمام…وبالنسبه ل..

قاطعه حاتم….عندك حل.

دياب…مش فاهم..

حاتم…لا فهمت يادياب…وانا بقي بسألك عندك حل بديل.

دياب…بغضب بسيط…لا معنديش بس ده بالنسبالي اصلا مش حل..

حاتم…دياب…ماتنساش انت هنا ليه انت هنا عشان تدرب لمار وبس….اي حاجه تانيه مش بتاعتك

دياب…ازاي يا افندم حضرتك اللي بتقول كده..

حاتم…في حجات يادياب بنكون مضطرين نعملها غصب عننا ومواقف بنتحط فيها لازم نعديها..

دياب…انا مش قادر اصدق الكلام اللي حضرتك بتقوله..طيب افرض انا موافق لو هر رفضت الحل هيكون ايه…

حاتم….وانت توافق او ترفض ليه…..

دياب….بارتباك انا انا..

حاتم…انت حبيتها ولا ايه يا سياده النقيب..

دياب…حبيتها انا لا بس..يعني

حاتم….واضح انك حبيتها. واعدتك معاها قربتك منها مش هقولك ميتفعش حب ..بس سواء لمار عملت اللي مطلوب منها او لا…انت ناسي يادياب لمار لما تخلص المهمه ده ان خرجت منها سليمه هتكون فين…لمار فالحالتين ميته يادياب..

دياب…بغضب…وصوت عالي…وعشان هي بالنسبالكم ميته…عادي بقي تبيع نفسها للبلد تبيع شرفها صح يا سياده اللواء ماهي ميته بقي..نستنفع منها باي حاجه..

حاتم…بغضب…ديااااب انت نسيت نفسك ولا ايه خد بالك من كلامك…

دياب…اسف يا افندم بس في مثل بيتقال فالمواقف اللي زي دي….

الضرب فالميت حراااام…سمعت عنه..

حاتم…افهم يا دياب انت ليه محسسني ان عايز ده يحصل وليه محسسني اني باجي عليها وعايز استنفز كل حاجه فيها…اولا مش عايزين نسبق الاحداث ثانيا احنا مش هنجبرها علي حاجه واكيد قبل ما تروحله لازم تكون عارفه هي راحه ليه…والقضيه دي كبيره. يادياب وتمس مصر واظن اننا ادام مصر كل اللي في ايده حاجه يقدر يقدمها المفروض انه يقدمها…

دياب…بالظبط زي ماحضرتك قولت اللي يقدر بقي….

حاتم….دياب…انت عارف انت غالي عندي اد ايه انا بعتبرك انت وانس ولادي اللي مخلفتهمش وانت عارف غلاوتكم عندي…وعارف اني بحبكم وبقلق عليكم كأنكم ولادي وانت عارف ان كانت امنيه عندي اشوفك رجعت زي الاول بتحب وبتتحب وبتعيش حياتك…

والوقت انا حاسس انك حبيت بس صدقني يادياب… علي اد ما انا فرحان ان قلبك ابتدا يدق علي اد ما انا المرادي شايف انه مينفعش مش لمار يادياب…دي واحده مستنيه حكم الاعدام كل الحكايه انه متأجل خصوصا انها في نظر الناس كلها ماتت واتنفذ فيها حكم الاعدام…فكر يادياب الدنيا مضاقتش بيك…وبعدين مش تجرب تعرفها الاول وتشوف ردها ايه..واظن انها مش هترفض دي فالاول والاخر واحده قاتله ومش اي حد دي قاتله ابوها يعني مش باقيه علي اي حاجه ومستبيعه..

دياب…وافرض حضرتك انها رفضت العمليه هتبوظ..

حاتم….بص يادياب… لمار توافق ترفض دي حاجه تخصها بس عايز اعرفك حاجه العمليه هتتنفذ يعني هتتنفذ براضها غصب عنها ومش كلامي ده كلام اللي فوق يا دياب…

دياب…عارف بس واضح ان حضرتك مأيده. وخليني امشي معاك ومعاهم. افرض انها رفضت وانها مضطره تنفذ غصب عنها ايه من وجهه نظر حضرتك يخليها تنفذ غصب عنها وهي زي ما حضرتك بتقول كده كده ميته….

حاتم…لا في حجات كتير تخليها توافق…

دياب…زي ايه.

حاتم…صحبتها والدتها..وخصوصا والدتها…..

دياب…اه تقصد حضرتك انكم هتمسكوها من ايدها اللي بتوجعها…

حاتم…صدقني ساعتها هنكون مضطرين…بس زي ما قولتلك اعرض عليها…ولو وافقت هتبقي جت منها…ولو في حل عندك عادي انا ممكن اساعدك فيه مش هقولك لا… بس فكر من هنا لحد ما تقابل الشخص ده تقدر تفكر في حل تاني…

دياب…كان واقف بيغلي وحااسس انه عايز يهد الدنيا بحالها وجواه بركان من الغضب….

بص دياب…علي لمار…وصفر بغضب…عشان تقف…

وقفت لمار…وهي مجهده جدا…راحتلهم..

حاتم…براڤو يا لنار..مكنتش متخيل انك شاطره اوي كده وفعلا دياب مبالغش في اي حاجه قالها عنك…

لمار…شكرا لحضرتك يا افندم…وبصت لدياب…وهي مبتسمه ابتسامه بسيطه…

ابتسم لها دياب غصب عنه..من بين غضبه….

حاتم….انا مضطر بقي اني امشي…

دياب….لسه بدري مش حضرتك قولت هتطول معانا ..

حاتم…يادوب.امشي كمان عشان احضر للنار الحاجه اللي طلباها وان شاء الله بكره الموبايل والحجاه هتكون عندك..

لمار…ان شاء الله..

حاتم… لو محتاجين اي حاجه من هنا لبكره عرفوني.

دياب.. ان شاء الله

حاتم ..اشوفكم علي خير…

سلمت عليه لمار…وطلعت…مشي حاتم وقفل وراه دياب.ورجع. فوق..

كانت لمار واقفه. ومستنياه. ومبتسمه..

دياب…تقدري ترتاحي شويه لو حابه الساعه الوقت 3 مفيش تمارين انهرده كفايه عليكي كده ممكن تنامي شويه وبليل هنكمل وكمان عايزك في حاجه مهمه.

لمار…اختفت ابتسامتها…كارمن فيها حاجه.

دياب…بابتسامه حنونه ياستي هو كل حاجه كارمن لا مش كارمن..

لمار….امال ايه..

دياب….بابتسامه يا بختها.

لمار…هي مين…

دياب…كارمن.

لمار…اشمعني.

دياب…يعني حبك ليها مبقاش موجود.

لمار…ليه بس…بالعكس…الحب موجود ديما..بس المهم نكون مخلصين وكارمن عندي غاليه اوي…اغلي من اي حاجه فالدنيا..

دياب…عشان كده بقولك يا بختها ويابخت اللي يلاقي حد يحبه كده..

ابتسمت لمار باحراج..

دياب…بليل هقولك الوقت يلا ادخلي ارتاحي وشوفي لو محتاجه اي حاجه قوليلي عليها عشان أبلغ سياده اللواء بيها..

لمار…شكرا…مش محتاجه اي حاجه.

دياب…ايه مش نفسك في حاجه.مثلا.

لمار….زي ايه.

دياب.. ياستي حتي لو بونبوني مثلا .

لمار….ابتسمت…باحراج.وبصت الناحيه التانيه.

دياب…ايه شكلك بتحبي البونبوني صح..متتكسفيش قولي..

بصتله لمار وهي بتضحك….يعني هنفرض اني بحبه هتقول لسياده اللوا لمار عايزه بونبوني…

دياب…والله انتي قولي وملكيش دعوه.

لمار…بضحكه طفوليه…انا خايفه عليك.

دياب…ابتسم ياستي ملكيش دعوه بيا ومتخافيش ايه ليكي فالحته دي…

لمار…باحراج..ؤ.صراحه هو لو مليش هقول ليا عشان بس اشوفك هتطلب ازاي.

دياب….ده انتقام ده ولا ايه…

لمار…يعني..صراحه اه.

دياب….ياساتر ليه بس.

لمار…عشان خليت روك يجري ورايا😔

دياب…انتي قلبك اسود اوي..وياستي خلاص بقيتو صحاب

لمار…لا مش اوي

دياب…اصلا روك ميقدرش يقرب منك طول مانا موجود.

لمار….ولو قرب..

دياب…هقتله…

لمار…بصت فالارض باحراج..

دياب…يلا ادخلي ارتاحي شويه…عشان شويه ونتغدي ونكمل تمام.

لمار…حاضر…….اااا

دياب…ايه. عايزه تقولي ايه..

لمار…يعني كنت عايزه اشكرك عالكلام اللي قولته في حقي..لسياده اللواء

دياب…انتي تستحقي اكتر من كده يالمار.

لمار…غريبه..

دياب…ايه اللي غريب.

لمار…يغني اول مره اشوفك تشكر فيا طول الوقت كنت موصلي احساس اني بعك ومش بعمل اي حاجه صح..

دياب…طيب ومفكرتيش للحظه اني متعمد اعمل كده عشان احفزك..

لمار….لا بس بصراحه يعني كنت بتحبطني مش بتحفزني.

دياب…مش باين وألا مكنتيش بقيتي بالمستوي دي…

لمار…ممكن بردو.

دياب…ده اكيد والاكيد انك بجد ذكيه وقويه وحجات كتير اوي…

لمار… شكرا..

دياب…عفوا

ابتسمت لمار ولاول مره تحس انها مرتاحه فالكلام معاه ديما كانت بتتلاشي الكلام معاه…

دياب….يلا ادخلي علي جوه ارتاحي شويه وافضلي دماغك من اي تفكير وشويه وهاجي انادي عليكي عشان تتغدي مفهوم.

لمار…حاضر..

دياب…يلا ادامي..

لمار…ابتسمت حاضر…

دخلت لمار ودخل دياب علي الاوضه وهو مقسوم نصين نص طاير من الفرحه ونص زي البركان…فضل اعد عالكنبه يشرب في سجاير ويفكر في اي حل….

……. …….

اما عند كارمن….صحيت من النوم لقت انس نايم ادامها عالكرسي وماسك ايدها…

اول ما اتحركت عشان تقوم…حس بيها انس…فتح عينه بسرعه…

انس…كارمن…في حاجه انتي تعبانه..

كارمن…بصوت مجهد…انا فين.

انس…انتي في بيتي ياكارمن…ومتخافيش انتي في امان.

كارمن….بتحاول تقوم قام انس مسك ايدها يساعدها عشان تتعدل..

كارمن…باستغراب…ايه ده ايه اللبس ده..ومين..قاطعها انس.

انس…متخافيش ياكارمن اولا ده لبسي لان اللبس اللي معاكي كله كان غرقان ثانيا مش انا اللي لبستك دي ورده مرات عبده البواب امبارح هو شافني وانا طالع بيكي وطلبت منه انها هتطلع تساعدك وكمان الدكتور طلع وكشف عليكي…ومن شويه بعت ممرضه ركبتلك محلول في ايدك. وخلص وشلته وانتي كل ده في دنيا تانيه…

كارمن….مش عارفه اشكرك ازاي علي وقفتك معايا

انس…متقوليش كده يا كارمن مفيش بينا شكر..

كارمن….يمكن لما حسيت ان الدنيا بتتقفل في وشي ملقتش حد يقف معايا غيرك ..لاني معنديش حد يقف معايا ..وبالرغم من الكلام اللي قولتهولك اخر مره بردو ساعدتني ووقفت معايا..

انس….انا قولتلك وقتها اي وقت تحتاجيني هتلاقيني جمبك…

كارمن…دموعها نزلت والله كان غصب عني بابا لما عرف انك بتتصل بيا خاف وقاللي لازم اقولك كده وانا مقدرتش اقوله لا خوفت….كان غصب عني…

انس…مسك ايدها بلاش عياط انا قولتلك مش زعلان وعارف انك متعمليش كده غير لو غصب عنك وكده كده كنت هستني كام يوم وارجع اكلمك …بس يارتني ما سمعت كلامك مكنش حصل كل ده..

كارمن…يعني مش زعلان

انس….ابتسم بحزن مقدرش ازعل من القمر اللي بيعيط ده…

كارمن….انت طيب اوي.

انس….كارمن

كارمن…نعم….

انس….مين اللي عمل فيكي كده؟؟؟؟؟؟؟؟

قد يهمك أيضاً :-

  1. رواية انتقام وعشق الفصل الخامس عشر 15 - بقلم اميرة محمود
  2. رواية يا انا يا هي (عشق الجاسر) الفصل الخامس 5 بقلم هاجر عبدالحليم
  3. رواية حبك نار الفصل التاسع عشر 19 بقلم اسماء الكاشف
  4. رواية غرام قلبي الفصل الأول 1 بقلم نبض القلب
  5. رواية غرام قلبي الفصل الثالث 3 بقلم نبض القلب
  6. رواية غرام قلبي الفصل الثاني 2 بقلم نبض القلب
  7. رواية غرام قلبي الفصل الرابع 4 بقلم نبض القلب

التعليقات

اترك رد